फेवा सरसफाई महाअभियानको शुभारम्भको दिन २ सय भन्दा बढी ट्रक फोहोर संकलन

पोखरा ।
सरिता गुरुङ्ग

पोखरा महानगरपालिकाको नेतृत्वमा शुभारम्भ गरिएको फेवा सरसफाई महाअभियान अन्तर्गत आज फेवातालको सफाई गर्ने काम भएको छ । महानगरपालिकाका ३३ वटा वडाका वडाध्यक्षहरुलाई फोकल पर्सनको रुपमा राखेर ३३ वटा पोइन्टहरु तोकी सोही अनुरुप फेवाताल सरसफाई गर्ने कामको थालनी भएको हो ।

यस महाअभियानको शुभारम्भ कार्यक्रममा हजारौंको संख्यामा स्वयंसेवी अभियान्ताहरुको सक्रिय सहभागितामा ड्याम साइडदेखि टंकपुरसम्मको सबै ठाउँलाई कभर गर्ने तवरमा फेवाताल सफाई गर्ने काम भएको हो ।

महानगरपालिकाका प्रमुख धनराज आचार्यले फेवातालको सिरदेखि फेदसम्म अवलोकन गर्ने क्रममा लगभग सबै ठाउँमा गरेर ५ हजार बढीको सहभागिता भएको पाईएको जानकारी दिएका छन् ।

मेयर आचार्यका अनुसार सुरुआती चरणमा ३५ ट्रक फोहोर जम्मा हन्छ कि भन्ने सोचेको तर अन्तिमसम्म आइपुग्दा २ सय भन्दा बढी ट्रक फोहोर संकलन भएको बताएका छन् ।

अघिल्ला वर्षहरुको तुलनामा यस वर्ष बेमौसमी वर्षा अलि बढी नै भएकाले तालमा जलकुम्भी झारहरु धेरै फैलिएको बताउँदै करिब ७५ प्रतिशत क्षेत्रमा फैलिएको झार यस फेवाताल सरसफाई महाअभियानको शुभारम्भको क्रममा निकालिएको बताएका छन् ।

प्रमुख आचार्यले यो एउटा सुरुवात मात्र भएको तर आगामी दिनमा यस अभियानलाई फरक ढंगमा निरन्तर रुपमा अगाडी बढाउने सम्बन्धमा महानगरपालिकाले स्थायी संयन्त्र बनाएर अगाडी बढ्ने बताएका छन् ।

यस सरसफाई अभियानमा पर्यटन व्यवसायी तथा होटेल व्यवसायीहरुको समेत साथ र सहयोग अति जरुरी भएको जनाएका छन् । उनले तालको छेउमा ठूला व्यवसाय संचालन गरिरहेका व्यवसायीहरुले ताल संरक्षण तथा सरसफाईमा कम चासो देखाएकोमा चिन्ता व्यक्त गरेका छन् ।

उनले फिष्टेल लजको वरपर नै धेरै फोहोर भएको र त्यस क्षेत्रमा अन्य धेरै ठूला–ठूला होटलहरु भएतापनि उनीहरुको सहभागिता नहुनु भनेको एउटा दुःखद एंव चिन्ताको विषय भएको बताएका छन् ।

मेयर आचार्यले जुन–जुन ठाउँमा बाक्लो रुपमा व्यवसायीहरु उपस्थित छन् त्यस ठाउँमा उनीहरु आफैले आफ्नो आसपासको क्षेत्रमा नियमित सरसफाई गर्ने कार्यमा जुट्न उनीहरुको ध्यानाकर्षण समेत गराएका छन् ।

फेवाताल सफाईका लागि ल्याइएको मेसिनमा पटक–पटक खराबी आएका कारण नियमित संचालन गर्न नसकिएको भएपनि हाल भने त्यसलाई मर्मत गरी आजदेखि नै मेसिनको क्षमता अनुसार संचालनमा ल्याइएको पनि जानकारी दिएका छन् ।

आचार्यले महानगरपालिकाले आज शुभारम्भ गरिएको फेवाताल सरसफाई महाअभियानमा सहभागी सम्पूर्ण आमा समूह, क्लब, विभिन्न सरकारी तथा गैरसरकारी संघ–संस्थाहरु, टोल विकास संस्था, वित्तिय संस्थाहरु, राजनीतिक दल, सुरक्षा निकाय, जनप्रतिनिधि, उद्योगि व्यवसायी, पर्यटन सम्वद् संस्थाहरु, सरोकारवालाहरुमा हार्दिक आभार सहित धन्यवाद दिएका छन् ।