प्रधानमन्त्री एक्लैको हातमा अहिले १६ वटा मन्त्रालय

काठ्माण्डौं ।

प्रधानमन्त्री पुष्पकमल दाहाल प्रचण्डले अहिले १६ वटा मन्त्रालयहरु सम्हालिरहेका छन् । नेकपा एमालेले समेत सरकारलाई दिएको समर्थन फिर्ता लिएसँगै सरकारमा सहभागी भएका मन्त्रीहरुले राजीनामा दिएपछि उनीहरुले सम्हालेका ८ वटा मन्त्रालय पनि उनले आफैसँग राखेका छन् ।

यसअघि राष्ट्रिय स्वतन्त्र पार्टी(रास्वपा)ले छाडेका ३ मन्त्री र १ राज्यमन्त्रीको जिम्मेवारी पनि उनले आफैसँग राखेका छन् । रास्वपाले छाडेका गृह, ऊर्जा, शहरी विकास र कानुन मन्त्रालय, शिक्षा, विज्ञान तथा प्रविधिको साथै श्रम, रोजगार तथा सामाजिक सुरक्षा मन्त्रालय पनि उनकै जिम्मामा रहेका छन् ।

यस्तै सोमबार एमालेले छाडेका ८ मन्त्रालयहरु अर्थ, कृषि, उद्योग, भूमि व्यवस्था, स्वास्थ्य, रक्षा, परराष्ट्र र महिला तथा बालबालिका मन्त्रालयको जिम्मेवारी पनि राष्ट्रपति विद्यादेवी भण्डारीले प्रधानमन्त्री प्रचण्डलाई तोकेकी छन् ।

त्यस्तै माघ ३ गते मन्त्रिपरिषद् विस्तार गर्दा वन तथा वातावरण मन्त्रालय र युवा तथा खेलकुद मन्त्रालय आफैसँगै राखेका थिए । यी सबै मन्त्रालय गरेर अहिले उनीसँग १६ वटा मन्त्रालयहरु रहेका छन् । अहिले सरकारमा माओवादी केन्द्र र जनमत पार्टीका मन्त्री मात्रै बाँकी रहेका छन् ।