प्रदेश नं. १ को नामाकरण .भएसँगै प्रदेश सरकारले दियो सार्वजनिक विदा

मोरङ ।

प्रदेश नं. १ को नामाकरण हुन सफल भएको छ । बुधबार बसेको प्रदेशसभाको दोस्रो बैठकले प्रदेशको नाम कोशी कायम गरेको छ । सो नाम दुई तिहाइको बहुमतले पाति गरेको हो । नामाकरण भएको खुशीयालीमा कोशी प्रदेश सरकारले विहीबार सार्वजनिक विदा दिएको छ ।

प्रदेशका आन्तरिक मामिला तथा कानुन मन्त्रालयका सचिव उमेश बस्नेतले विज्ञप्ति निकालेर आज प्रदेशभर सार्वजनिक विदा दिने निर्णय भएको जानकारी दिएका हुन् । नामाकरणबारे पहिचान पक्षधर र भूगोल पक्षधरको चर्को दबाब र आन्दोलन नहोस् भनि विराटनगरमा निषेधाज्ञा लागू गरिएको छ ।

सम्भावित अवस्थालाई मध्यनजर गर्दै विराटनगरमा दिउँसो ३ बजेदेखि अर्को आदेश नभएसम्म निषेधाज्ञा लागू गरिएको जिल्ला प्रशासन कार्यालय मोरङले जानकारी दिएको छ । कोशी नामाकरणको विषयलाई लिएर हिजो बुधबारदेखि नै त्यहाँ प्रदर्शनका विभिन्न कार्यक्रमहरु भएको थियो । सोही प्रदर्शनलाई लिएर नै सुरक्षा व्यवस्था कडा पारिएको हो ।

विशेषगरी यस प्रदेशको नाम कोशी राख्न एमालेका सांसद राम बहादुर मगरले प्रस्ताव गरेका थिए । उक्त प्रस्तावमा मत विभाजन हुँदा ८२ मत पक्षमा र ४ मत विपक्षमा परेको थियो । मतदान प्रकियामा भने ६ जना सांसद अनुपस्थित रहेका थिए । कोशी प्रदेश सभामा ९३ जना सांसद छन् ।

जसअन्र्तगत एमालेकोतर्फबाट सबैभन्दा बढी सांसद उपस्थित छन् । एमालेको ४०, कांग्रेसको २९, माओवादीको १३, राप्रपाको ६, नेकपा एकीकृत समाजवादीको ४ र जसपाको १ जना सांसद रहेका छन् ।