कार्तिक २१, काठमाडौं ।।
राष्ट्रपति रामचन्द्र पौडेलले लोकतन्त्रको आधार संवाद र सहकार्यमा टेकेको बताउँदै राजनीतिक दलहरूबीचको आपसी द्वन्द्वले होइन, संवादले लोकतन्त्रलाई बलियो बनाउने बताएका छन्।
शुक्रबार(आज)शीतल निवासमा प्रतिनिधिसभा र राष्ट्रियसभाका सभामुख, उपसभामुख तथा प्रदेशसभाका सभामुख, उपसभामुखसँगको भेटमा राष्ट्रपतिले नागरिकको आवाज सुन्ने र लोकतान्त्रिक आचरणलाई जीवनशैलीको हिस्सा बनाउनुपर्ने आवश्यकता औंल्याए।
उनले युवा पुस्तामा सुशासन र विकासप्रतिको बढ्दो आकांक्षालाई सम्बोधन गर्न सके संविधानको संरक्षण र लोकतन्त्रको उन्नति सम्भव हुने विश्वास व्यक्त गरे।
आगामी फागुन २१ गते हुने प्रतिनिधिसभा सदस्यको निर्वाचनलाई सफलतापूर्वक सम्पन्न गर्नु सबै राजनीतिक शक्ति र संस्थाहरूको साझा जिम्मेवारी भएको उनको भनाइ छ।
त्यस्तै उनले संसदीय प्रणालीको मजबुती कुनै एक दल, सरकार वा नेतृत्वको मात्र उत्तरदायित्व नभई सम्पूर्ण राष्ट्रको सामूहिक जिम्मेवारी भएको समेत बताए।
