पौष ३, काठमाडौं ।।
जल तथा मौसम पूर्वानुमान महाशाखाले बिहीबार(आज) देशभरको मौसमी अवस्था मुख्यतया सफा रहने जनाएको छ।
हाल नेपालमा कुनै उल्लेखनीय मौसमी प्रणाली सक्रिय नरहेकाले दैनिक जनजीवन प्रभावित हुने खालको मौसम नदेखिएको महाशाखाको भनाइ छ।
महाशाखाका अनुसार आज दिउँसो कर्णाली र सुदूरपश्चिम प्रदेशसहित देशका अधिकांश हिमाली भू-भागमा आंशिक बदली रहने अनुमान गरिएको छ। बाँकी पहाडी तथा तराई क्षेत्रमा भने मौसम प्रायः खुला रहनेछ । यसले गर्दा दैनिक आवागमन, कृषि तथा बाहिरी गतिविधिमा सहजता आउने अपेक्षा गरिएको छ।
त्यस्तै आज राति गण्डकी, लुम्बिनी, कर्णाली र सुदूरपश्चिम प्रदेशमा आंशिक बदली रहने पूर्वानुमान गरिएको छ। यी प्रदेशबाहेक अन्य भू-भागमा भने मौसम मुख्यतया सफा नै रहने महाशाखाले जनाएको छ।
मौसम स्थिर रहेकाले यात्रु, किसान तथा सर्वसाधारणलाई विशेष सतर्कता अपनाउनुपर्ने अवस्था नरहेको महाशाखाको निष्कर्ष छ। तर हिमाली क्षेत्रमा तापक्रम घट्न सक्ने भएकाले चिसोबाट जोगिन आवश्यक सावधानी अपनाउन महाशाखाले सुझाव दिएको छ।
