भाद्र ३१, काठमाडौं ।।
फिफाको निलम्बनमा परेको नेपाललाई बाहिर राखेर दक्षिण एशियाली फुटबल महासंघ (साफ) ले पुरुष च्याम्पियनसिपको खेल तालिका सार्वजनिक गरेको छ ।
साबिक विजेता भारतले साफ च्याम्पियनसिपको उद्घाटन खेलमा पाकिस्तानसँग खेल्नेछ । यो प्रतियोगिता बङ्गलादेशको राजधानी ढाकामा आउँदो नोभेम्बर ५ देखि शुरु हुनेछ । उद्घाटन दिनको दोस्रो खेलमा आयोजक बङ्गलादेश र भुटान खेल्नेछन् ।
६ टोली सहभागी प्रतियोगिताको समूह चरणमा तीन खेल हुनेछन् । हरेक दिन दुई वटा खेल हुने भएका छन् । समूह ‘ए’ मा आयोजक बङ्गलादेश, भुटान र श्रीलंका तथा समूह ‘बी’ मा भारत, पाकिस्तान र माल्दिभ्स रहेका छन् । नेपाल भने फिफाको निलम्बनमा रहेकाले अहिले समावेश गरिएको छैन ।
यद्यपि, सेप्टेम्बर ३० तारिख भित्र नेपालको निलम्बन फुकुवा भएमा संशोधित खेल तालिका सार्वजनिक गरिने साफले जनाएको छ ।
