पोखराबाट विभिन्न बैंकको एटीएम फोरेको आरोपमा एक युवकलाई पक्राउ गरी आज सार्वजनिक
  • प्रमुख खबर

पोखरा ।
सरिता गुरुङ्ग

जिल्ला प्रहरी कार्यालय कास्कीले पोखराबाट विभिन्न बैंकको एटीएम फोरेको आरोपमा नवलपुरको देवचुली नगरपालिका–५ २१ वर्षिय अनिस तामाङ्ग नाम गरेको एक युवकलाई एक महिनापछि पक्राउ गर्न सफल भएको छ ।

हाल पोखरा महानगरपालिका वडा नं. ३० बस्ने तामाङ्गलाई गण्डकी प्रदेश प्रहरी र कास्की प्रहरीको संयुक्त टोलीले लेखनाथबाट पक्राउ गरि आज सार्वजनिक गरेको हो ।

कास्की प्रहरीका प्रहरी प्रमुख तथा प्रहरी उपरीक्षक अजय केसीका अुनसार ती युवकले गत श्रावण २ गते पोखरा–३० अघौंचोक स्थित एनएमबी बैंकको एटीएम फोरेर १४ लाख ७१ ह्जार ५ सय रुपैँया लुटेका थिए ।

त्यस्तै सोही दिन तामाङ्गले पोखरा–२७ तालचोक स्थित एनआईसी एशिया बैंकको एटीएम मेसिन समेत फोर्ने प्रयास गरेका थिए । एनएमबी बैंकको एटीएम बुथ फोरेर रकम चोरी र तालचोक स्थित एनआईसी एशिया बैंकको एटीएम मेसिन फोर्ने प्रयासमा तामाङ्गको संलग्नता रहेको प्रहरीको दावी रहेको छ ।

पक्राउ परेका ती युवकलाई ७ दिनको म्याद थप गरि अनुसन्धान भइरहेको प्रहरीले बताएको छ । एसपी के.सी.का अनुसार गत कात्तिकदेखि हालसम्म कास्कीमा ८ वटा एटिएम मेसिन फोड्ने प्रयास भईसकेको जानकारी पनि दिएका छन् ।

तपाईको प्रतिक्रिया दिनुहोस्