पोखरा ।
सरिता गुरुङ्ग
गण्डकी प्रदेशको राजधानी पोखरामा शुक्रबारबाट औपचारिक रुपमा नवौं राष्ट्रिय खेलकुद प्रतियोगिता शुभारम्भ भएको छ । “एकतावद्ध देश, खेलकुदको सन्देश” भन्ने नाराका साथ सुन्दर नगरी पोखरामा यस प्रतियोगिताको समुद्घाटन भएको हो ।
झण्डै ४ दशकपछि गण्डकी प्रदेशमा आयोजना भएको यस प्रतियोगिताको उद्घाटन उपराष्ट्रपति नन्द बहादुर पुनले गर्नुभएको छ । यस प्रतियोगिताको उद्घाटन राष्ट्रपति विद्यादेवी भण्डारीले गर्ने तयारी भएपनि उहाँलाई कोरोना संक्रमण भएपछि उप–राष्ट्रपति पुनले आज एक भव्य कार्यक्रमका बीच उद्घाटन गर्नुभएको हो ।
उप–राष्ट्रपति पुनले नवौं राष्ट्रिय खेलकुद प्रतियोगिताको उद्घाटन गर्दै यस प्रतियोगिता सम्पूर्ण खेलाडीहरुको लागि महान उत्सव भएको बताउनुभएको छ । उहाँले यस प्रतियोगिताले गण्डकी प्रदेशलाई खेल पर्यटनको गन्तव्यका रुपमा स्थापित गर्न योगदान गर्ने जनाउनुभएको छ ।
उहाँले यस राष्ट्रिय प्रतियोगितामा सहभागि हुने सम्पूर्ण खेलाडीहरुलाई उच्च मनोबल र आत्माविश्वासका साथ खेलमा सहभागी बन्न आग्रह गर्नुहुँदै सफलताका लागि शुभकामना समेत दिनुभएको छ । उप–राष्ट्रपति पुनले यस नवौं राष्ट्रिय खेलकुद प्रतियोगिताले क्षमतावान, सक्षम र प्रतिभावान खेलाडीहरु तयार गर्ने विश्वास पनि व्यक्त गर्नुभएको छ ।
प्रतियोगिता समुद्घाटन समारोहमा युवा तथा खेलकुद मन्त्री महेश्वर गहतराज, संस्कृति, पर्यटन तथा नागरिक उड्डयन मन्त्री जीवनराम श्रेष्ठ, गण्डकी प्रदेशका मुख्य मन्त्री कृष्ण चन्द्र नेपाली पोखरेल, गण्डकी प्रदेश प्रमुख पृथ्वीमान गुरुङ्ग, राखेपका सदस्य सचिव टंकलाल घिसिङ लगायतका विशिष्ट व्यक्तिहरुको उपस्थिति रहेको थियो ।
उद्घाटन समारोहमा यस प्रतियोगितामा सहभागी जनाउने ११ टिमको मार्चपासका साथै ट्रफी टुरका सद्धभावना दूतहरुको मार्चपास, सातै प्रदेश झल्कने नृत्य लगायतका विभिन्न मनोरञ्जनात्मक कार्यक्रहरु प्रस्तुत गरिएको थियो ।
कुल ३६ वटा खेल र २ प्रदर्शनी सहित ३८ खेल समावेश गरिएको छ । यस प्रतियोगितामा ६ हजार १ सय ५७ खेलाडीहरु सहभागि भएका छन् भने करिब १ हजार ३ सय पदकका लागि प्रतिस्पर्धा हुने भएको छ ।
वि.सं २०३८ सालमा राखेपका तत्कालीन सदस्य सचिव शरदचन्द्र शाहले सुरुवात गरेको यस प्रतियोगिता २०४० सालमा दोस्रो संस्करणको राष्ट्रिय खेलकुद गर्ने मौका पोखराले पाएको थियो । र त्यसको ३९ वर्षपछि पून एकपटक यस प्रतियोगिता आयोजना गर्ने मौका पोखरालाई पाएको छ ।
यस प्रतियोगिता गण्डकी प्रदेशका विभिन्न ८ जिल्लाहरुमा संचालन भईरहेको छ । ती ८ जिल्लाहरुमा कास्की, तनँहु, पर्वत, गोरखा, स्याङजा, नवलपुर, म्याग्दी र बाग्लुङका रहेका छन् ।
