काठमाडौं ।।
कान्तिपुर पब्लिकेसन्सका अध्यक्ष कैलाश सिरोहियाविरुद्ध पक्राउ पुर्जी जारी भएको छ ।
नागरिकतासम्बन्धी कसुरमा अनुसन्धानका लागी सिरोहियालाई पक्राउ गर्न जिल्ला अदालत, धनुषाले अनुमति दिएको हो ।
सिरोहियाविरुद्ध सर्लाहीका इन्द्रजित महतोले जिल्ला प्रहरी कार्यालय, धनुषामा १६ वैशाख २०८१ मा किटानी जाहेरी दिएका थिए । जाहेरीमा सिरोहियाले फरकफरक नम्बरका नागरिकताहरु प्रयोग गरिरहेको भन्दै नागरिकता ऐन, २०६३ अनुसारको कसूरमा छानबिन गर्न माग गरिएको थियो ।
धनुषा जिल्ला प्रशासन कार्यालयबाट जारी ३९६९८८८६ नम्बरको नागरिकता सिरोहियाको नामको नभइ धनुषाकै जनकपुर–२ निवासी शिवजी साहु तेलीको नाममा रहेको देखिने जाहेरीमा भनिएको छ । सोही नागरिकता नम्बर तेलीको मतदाता नामावली पनि उल्लेख रहेको भनिएको छ ।
