भदौ १५, काठमाडौं ।।
नेपाल सरकारले भोटेकोशीमा आएको बाढीले ज्यान गुमाएका मृतकको शव पहिचानका लागि सिंगापुरसँग सहयोग मागेको छ । परराष्ट्र मन्त्रालयका प्रवक्ता लोकबहादुर क्षेत्रीले सोमबार(आज) आयोजित पत्रकार सम्मेलनमा पीडित पहिचानका लागि प्राविधिक सहयोग मागेको जानकारी दिएका हुन्।
प्रवक्ता क्षेत्रीले अमेरिकासँग डीएनए परीक्षण र चीन सिंगापुरसँग उच्च क्षमताका आवश्यक उपकरणका पनि अनुरोध गरेको बताए ।
यस्तै जापान र दक्षिण कोरियाबाट पनि थप विशेष सामग्री चाँडै प्राप्त हुने अपेक्षा गरिएको उनले स्पष्ट पारे। उनका अनुसार अहिलेसम्म भारत, चीन, फ्रान्स, संयुक्त राज्य अमेरिका, संयुक्त अरब इमिरेट्स (यूएई), दक्षिण कोरिया लगायतका देश तथा अन्य साझेदारबाट उद्धार तथा राहतका सामग्री प्राप्त भएका छन्।
संयुक्त राष्ट्रसंघ, विश्व स्वास्थ्य संगठन र युनिसेफबाट पनि थप सामग्री तथा सहयोग आउने क्रममा रहेको क्षेत्रीले बताए।सहयोगमा उद्धार उपकरण, फ्रिजर, सौर्य बत्ती, परीक्षण किट, चेन, कम्बल, स्लीपिङ ब्याग, खाद्यान्न र औषधिलगायतका सामग्री छन्।
भारतबाट विशेष उद्धार टोली प्रभावित क्षेत्रमा परिचालन गरिएको छ भने कोरियाली टोली पनि घटनास्थलमा खटिएको मन्त्रालयले जनाएको छ।
त्यस्तै उनले विपद्पछिको पुनःस्थापना र पुनर्निर्माणमा पनि नेपालले अन्तर्राष्ट्रिय सहयोग आवश्यक पर्ने अपेक्षा गरेको बताए । बाढीबाट भएको क्षतिको आधारमा घर, सडक, पुल, जलविद्युत् आयोजना तथा अन्य पूर्वाधार पुनःस्थापनाका लागि आवश्यक स्रोत निर्धारण गरिने मन्त्रालयले जनाएको छ।
