असोज १८, पोखरा ।।
नेपाली कांग्रेसको १५औँ महाधिवेशनका लागि कास्की क्षेत्र नम्बर ३ बाट दलित महिला कोटातर्फ गौमाया नेपाली महाधिवेशन प्रतिनिधिमा निर्वाचित भएकी छन्। लामो समयदेखि नेपाली कांग्रेसको राजनीतिमा सक्रिय रहँदै आएकी नेपालीले महाधिवेशन प्रतिनिधिमा निर्वाचित भएसँगै आफ्नो राजनीतिक यात्राको नयाँ अध्याय सुरु भएको बताएकी छन्।
२०६६ सालदेखि नेपाली कांग्रेसको राजनीतिमा सक्रिय रहँदै आएकी नेपालीले विद्यार्थी जीवनदेखि नै सामाजिक तथा राजनीतिक गतिविधिमा सहभागिता जनाउँदै आएको बताइन्छ। १६ वर्षको कलिलो उमेरदेखि नै समाज परिवर्तनको उद्देश्यसहित नेपाली कांग्रेसको राजनीतिमा सक्रिय भएको उनको भनाइ छ।
अन्नपूर्ण गाउँपालिकाकी नेतृका रूपमा समेत परिचित नेपालीले स्थानीय तहको राजनीतिमा पनि विभिन्न जिम्मेवारी सम्हालिसकेकी छन्। २०७४ सालको पहिलो स्थानीय तह निर्वाचनमा अत्यधिक मतसहित वडा सदस्यमा निर्वाचित भएको र त्यसपछि अन्नपूर्ण गाउँपालिकाको उपाध्यक्ष तथा कार्यवाहक पालिका अध्यक्षको जिम्मेवारीसमेत सम्हालेको विवरण उनले सार्वजनिक गरेकी छन्।
स्थानीय तहमा रहँदा विभिन्न सामाजिक तथा सार्वजनिक जिम्मेवारी निर्वाह गर्दै आएकी नेपाली हाल पुनः वडा सदस्यमा निर्वाचित भएर काम गरिरहेकी छन्। यस क्रममा उनले पटक–पटक कार्यवाहक वडा अध्यक्षको जिम्मेवारीसमेत सम्हाल्दै आएको बताएकी छन्।
दलित समुदायबाट राजनीतिक यात्रामा अघि बढेकी नेपालीले सामाजिक तथा राजनीतिक क्षेत्रमा आफूले पाएको जिम्मेवारीलाई अवसरका रूपमा लिँदै आएको बताउँदै आएकी छन्। सामाजिक क्षेत्रमा समेत विभिन्न जिम्मेवारी निर्वाह गर्दै आएकी नेपालीले दलित तथा सीमान्तकृत समुदायप्रति समाजको दृष्टिकोण परिवर्तन गर्न आफ्नो राजनीतिक यात्रालाई उपयोग गर्ने बताएकी छन्।
१५औँ महाधिवेशनका लागि उम्मेदवारी घोषणा गर्ने क्रममा नेपालीले पार्टीको संगठनलाई थप गतिशील, समावेशी र सशक्त बनाउने आफ्नो प्रमुख लक्ष्य रहेको बताएकी थिइन्। उनले राष्ट्रियता, लोकतन्त्र र समाजवादका आदर्शलाई आत्मसात गर्दै दलित, महिला तथा सीमान्तकृत समुदायका सवाललाई पार्टीको नीति निर्माण तहसम्म प्रभावकारी रूपमा पुर्याउने प्रतिबद्धता व्यक्त गरेकी थिइन्।
सामाजिक सञ्जालमार्फत महाधिवेशन प्रतिनिधिहरूसँग मत तथा सहयोगका लागि अपिल गर्दै उनले आफूलाई विश्वास गरी जिम्मेवारी प्रदान गरिए पार्टी संगठनसँगै समाजमा सकारात्मक परिवर्तनका लागि जिम्मेवार भूमिका निर्वाह गर्ने बताएकी थिइन्।
निर्वाचनबाट विजयी भएसँगै नेपाली कांग्रेसको १५औँ महाधिवेशनमा कास्की क्षेत्र नम्बर ३ बाट दलित महिला कोटामा गौमाया नेपालीको प्रतिनिधित्व सुनिश्चित भएको छ। लामो समयको राजनीतिक सक्रियतापछि महाधिवेशन प्रतिनिधिमा निर्वाचित हुनुलाई उनले आफ्नो राजनीतिक यात्राको महत्वपूर्ण उपलब्धिका रूपमा लिएकी छन्।
निर्वाचित भएपछि नेपालीले आफूलाई विश्वास गरी मतदान गर्ने सम्पूर्ण महाधिवेशन प्रतिनिधिहरूप्रति आभार व्यक्त गर्दै आगामी दिनमा पार्टी संगठन, सामाजिक न्याय, समावेशी प्रतिनिधित्व तथा दलित र महिलाका सवालमा थप सक्रिय भएर काम गर्ने प्रतिबद्धता व्यक्त गरेकी छन्। उनको महाधिवेशन प्रतिनिधिका रूपमा भएको निर्वाचितसँगै कास्की क्षेत्र नम्बर ३ बाट नेपाली कांग्रेसको महाधिवेशनमा दलित महिला प्रतिनिधित्वसमेत सुनिश्चित भएको छ।
