भदौ १२, काठमाडौं ।।
अष्ट्रेलिया सरकारले रसुवा बाढीबाट प्रभावितका लागि ५० लाख अष्ट्रेलियन डलर बराबरको मानवीय सहायता उपलब्ध गराउने घोषणा गरेको छ । शुक्रबार(आज)
अष्ट्रेलिया सरकारले विज्ञप्ति जारी गर्दै बाढी प्रभावित क्षेत्रमा तत्काल उद्धार, राहत तथा पुनःस्थापनाका लागि उक्त सहायता उपलब्ध गराउने जनाएको हो ।
अष्ट्रेलियाली सरकारका अनुसार बाढीमा कम्तीमा ३९ जना अष्ट्रेलियाली नागरिक बेपत्ता भएको रिपोर्ट प्राप्त भएको छ । उनीहरूको अवस्था यकिन गर्न तथा प्रभावितलाई आवश्यक सहयोग उपलब्ध गराउन अष्ट्रेलियाली अधिकारीहरू सक्रिय रहेको विज्ञप्तिमा उल्लेख छ ।
अष्ट्रेलियाको विदेश मामिला तथा व्यापार विभागले प्रभावित अष्ट्रेलियाली नागरिकलाई सहयोग गर्न थप कर्मचारी परिचालन गरेको छ । नेपालस्थित अष्ट्रेलियाली दूतावासका कर्मचारीसँगै संकट प्रतिकार्य टोली (क्राइसिस रेस्पोन्स टिम) का एक सदस्य र क्षेत्रीय कन्सुलर अधिकारी काठमाडौंमा परिचालन गरिएको छ । थप क्षेत्रीय तथा संकट प्रतिकार्य टोलीका कर्मचारीलाई पनि परिचालन गर्ने तयारी भइरहेको जनाइएको छ ।
अष्ट्रेलियाले आगामी ४८ घण्टाभित्र तीन जना मानवीय सहायता विशेषज्ञको प्रारम्भिक टोली नेपाल पठाउने पनि जनाएको छ । उनीहरूले काठमाडौंमा रहेका अष्ट्रेलियाली कर्मचारीसँग समन्वय गर्दै मानवीय अवस्थाको मूल्यांकन, व्यवस्थापन, सञ्चार तथा राहत योजनामा सहयोग गर्नेछन् ।
अष्ट्रेलियाले घोषणा गरेको ५० लाख डलर सहायता स्थापित साझेदार संस्थामार्फत खाद्यान्न, आपत्कालीन आश्रय, स्वच्छ खानेपानी तथा सरसफाइ लगायतका अत्यावश्यक सेवामा खर्च गरिने जनाएको छ ।
सहायतामध्ये २० लाख डलर विश्व खाद्य कार्यक्रम (डब्ल्युएफपी) लाई उपलब्ध गराइनेछ ।
डब्ल्युएफपीले नेपालमा आपत्कालीन राहतका लागि खाद्यान्न तथा लजिस्टिक सहयोग सुरु गरिसकेको अष्ट्रेलियाले जनाएको छ ।
यस्तै २० लाख डलर अष्ट्रेलियन ह्युम्यानिटेरियन पार्टनरसिपमार्फत अष्ट्रेलियाली गैरसरकारी संस्थालाई उपलब्ध गराइनेछ । यसबाट आपत्कालीन आश्रय, सरसफाइ सामग्री, कम्बल, स्वास्थ्य उपचार तथा मनोसामाजिक सहयोग प्रदान गरिनेछ ।
त्यस्तै १० लाख डलर इमर्जेन्सी एक्सन एलायन्समार्फत स्थानीय नेतृत्वमा हुने पुनःस्थापना तथा पुनर्निर्माणका काममा खर्च गरिनेछ ।
