भदौ १५, काठमाडौं ।।
रसुवाको भोटेकोशीमा आएको विनाशकारी बाढीमा बेपत्ताहरू भएकाहरुको यकिन तथ्यांक नरहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ । बाढीका कारण बेपत्ता भएका व्यक्तिहरुको यकिन संख्या निर्धारण गर्न अझै कठिन भइरहेको प्राधिकरणले जनाएको हो ।
अहिले स्थानीय तह, जिल्ला प्रशासन कार्यालय, नेपाल प्रहरी, नेपाली सेना, सशस्त्र प्रहरी, राष्ट्रिय निकुञ्ज तथा हाइड्रो आयोजनालगायत सम्बन्धित निकायबाट विवरण संकलन गर्ने काम भइरहेको प्राधिकरणकी प्रवक्ता शान्ति महतले बताएकी छन् ।
उनका अनुसार सोमबार(आज) बिहान ९ बजेसम्म आधिकारिक निकायबाट प्राप्त विवरणअनुसार ४ हजार २०२ जना बेपत्ता छन् । अहिले उद्धार तथा खोजी कार्य जारी रहेकाले यो संख्या अझै घटबढ हुन सक्ने पनि उनले बताइन् । अझै पनि धेरै मानिसहरू सम्पर्कविहीन हुँदा
विभिन्न हाइड्रोपावर आयोजना तथा सुरुङबाट उद्धार कार्य जारी रहेको छ ।
हाइड्रोको सुरुङबाट मात्रै २८९ जनाको उद्धार गरिएको छ । आइतबार चिनियाँ १५ र भारतीय ७ गरी थप २२ जनालाई हाइड्रो क्षेत्रबाट उद्धार गरिएको थियो भने आज पनि उद्धार कार्य जारी रहेको उनको भनाइ छ । यस्तै उनले लाङटाङ हाइड्रोमा भएको क्षतिसम्बन्धी पनि अहिलेसम्म छुट्टै विवरण प्राप्त नभएको बताइन् ।
हालसम्म रसुवा बाढीमा परि ज्यान गुमाएका ९ सय ३ जनाको शव फेला परेको छ । १० हजार बढीको उद्धार गरिएको छ भने २६७ जना घाइतेहरू उपचारपछि घर फर्किएका छन् । त्यस्तै सम्पर्क विहीनहरूको खोजीका लागि २० हजार ८१९ सुरक्षाकर्मी परिचालन गरिएको छ ।
