मङ्सिर २५, काठमाडौँ
प्रधानमन्त्री सुशीला कार्की आज राष्ट्रपति रामचन्द्र पौडेललाई भेट्न शीतलनिवास पुगेकी छिन्। सिंहदरबारमा बसेको मन्त्रिपरिषद्को बैठक सकिएलगत्तै उनी विशेष रूपमा राष्ट्रपति निवासतर्फ गएकी हुन्।
प्रधानमन्त्रीको सुरक्षा स्रोतका अनुसार भेटवार्ताको तयारी अघि नै गरिएको थियो, र बैठकमा उठेका केही महत्वपूर्ण विषय राष्ट्रपतिसँग साझा गर्नुपर्ने भएकाले तत्काल शीतलनिवासतर्फ प्रस्थान गरिएको थियो।
शीतलनिवास पुगेपछि राष्ट्रपति पौडेल र प्रधानमन्त्री कार्कीबीच अहिले विस्तृत रूपमा छलफल भइरहेको स्रोतले जनाएको छ। दुवै उच्च पदाधिकारीबीचको आजको भेटलाई औपचारिक भेटभन्दा पनि परामर्शमूलक र परिस्थितिजन्य बैठकको रूपमा लिइएको छ। केही महत्वपूर्ण राजनीतिक घटनाक्रम, सरकारी निर्णय, राष्ट्रिय सुरक्षा तथा कार्यान्वयन तहका विषय–वस्तु छलफलको एजेन्डामा रहेको बताइएको छ।
हालैको राजनीतिक वातावरण, सरकारका तर्फबाट हालै लिइएका निर्णय र आगामी दिनमा लागू हुन सक्ने योजनाका बारेमा राष्ट्रपतिलाई जानकारी गराउने उद्देश्य पनि आजको भेटको कारण मानिएको छ। साथै, मन्त्रिपरिषद् बैठकमा भएको कुराकानी, केही मन्त्रालयस्तरीय परिवर्तन तथा राज्यप्रशासनसँग सम्बन्धित मुद्दाहरूमा राष्ट्रपतिको सुझाव र मार्गदर्शन लिन प्रधानमन्त्री तत्पर रहेको स्रोतको भनाइ छ।
शीतलनिवासभित्र जारी छलफललाई लिएर आधिकारिक रुपमा कुनै विवरण सार्वजनिक गरिएको छैन। तर, दुवै पक्षले राष्ट्रिय महत्वका विषयमा सहकार्य र समन्वयलाई थप मजबूत बनाउने उद्देश्यले भेटवार्ता भएको जनाइएकाे छ।
प्रधानमन्त्री कार्की र राष्ट्रपति पौडेलबीचको आजको भेटले आगामी राजनीतिक गतिविधि र सरकारका निर्णय प्रक्रियामा केही स्पष्टता ल्याउने अपेक्षा गरिएको छ।
