पौष ३, काठमाडौं ।।
नेकपा एमालेको ११औँ महाधिवेशन अन्तर्गत नयाँ नेतृत्व चयनका लागि भएको मतदान प्रक्रिया २२ घण्टापछि सम्पन्न भएको छ।
काठमाडौंको भृकुटीमण्डपमा हिजो बिहान ९ बजेदेखि सुरु भएको मतदान आज बिहान पौने ७ बजे समाप्त भएको हो।
लामो समयसम्म चलेको मतदान प्रक्रियाले महाधिवेशनलाई अझै ऐतिहासिक र चासोपूर्ण बनाएको छ।
निर्वाचन समितिका अनुसार महाधिवेशनमा सहभागी २ हजार २ सय ६३ प्रतिनिधिमध्ये २ हजार २ सय २७ जनाले मात्र मतदान गरेका छन्। बाँकी ३६ जना प्रतिनिधि मतदान प्रक्रियामा अनुपस्थित रहेका थिए।
यसपटक एमालेको चुनावमा विद्युतीय मेसिन प्रयोग गरेर मतदान गरिएको थियो। तर एक प्रतिनिधिलाई मतदान गर्न न्यूनतम ९ मिनेटदेखि अधिकतम २ घण्टासम्म समय लागेको केही नेताहरूले बताएका छन्।
केन्द्रीय कमिटीका ३ सय १ पदका लागि सबै पदमा मतदान गर्नुपर्ने व्यवस्था र प्रतिनिधिले आ-आफ्नो प्यानल अनुसारको सूची हेरेर मत हाल्नुपर्ने भएकाले मतदान प्रक्रिया अपेक्षाभन्दा ढिलो भएको निर्वाचन समितिले जनाएको छ।
एमालेको केन्द्रीय कमिटीका ३ सय १ पदका लागि कुल ६ सय ३ जनाले उम्मेदवारी दिएका थिए । जसले गर्दा पार्टीभित्रको यसपटकको आन्तरिक प्रतिस्पर्धा निकै कडा र रोचक देखिएको छ।
यस्तै पदाधिकारी तहमा पनि प्रतिस्पर्धा रोचक बनेको छ।
जसमा अध्यक्ष पदका लागि २ जना उम्मेदवार, ५ जना उपाध्यक्ष पदमा ११ जना, महासचिव २ जना, ३ उपमहासचिवका लागि ७ जना र ९ सचिवका लागि २० जनाले उम्मेदवार दिएका थिए ।
यस महाधिवेशनको सबैभन्दा चासोको विषय भनेको पार्टी अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीचको प्रतिस्पर्धा रहेको छ।
दुवै नेताहरू छुट्टाछुट्टै प्यानलसहित चुनावी मैदानमा उत्रिएका छन्, जसले नेतृत्व चयनलाई अझ रोचक र निर्णायक बनाएको छ।
त्यस्तै निर्वाचन समितिले मतगणना प्रक्रिया तीव्र रूपमा अघि बढाइरहेको र आजसम्म नतिजा सार्वजनिक गर्ने तयारी भइरहेको जनाएको छ।
यस महाधिवेशनले नयाँ नेतृत्व चयनसँगै एमालेको भावी राजनीतिक दिशा र संगठनात्मक संरचना कस्तो बन्छ भन्ने विषयमा राजनीतिक वृत्तमा विशेष चासोका साथ हेरिएको छ। यसको साथै सबैभन्दा बढी ध्यान यतिबेला एमालेको भावी अध्यक्ष काे बन्छ भन्ने पनि रहेको छ।
