बैशाख २२, काठमाडौं ।।
राष्ट्रपति रामचन्द्र पौडेलले प्रधानमन्त्री बालेनद्र शाह(बालेन) नेतृत्वको सरकारले सिफारिस गरेको ८ वटै अध्यादेश जारी गरेका छन् ।
राष्ट्रपति पौडेलले मंगलबार(आज) संवैधानिक परिषद्सम्बन्धी अध्यादेश जारी गरेका हुन् । यसअघि उनले संवैधानिक परिषद्को काम, कर्तव्य, अधिकार र कार्यविधि (पहिलो संशोधन) अध्यादेश, २०८३ पुनर्विचारका लागि फिर्ता पठाएकोमा सोमबार बसेको मन्त्रिपरिषद् बैठकले सोही अध्यादेशलाई हुबहु पठाएसँगै उक्त अत्यादेश जस्ताको त्यस्तै जारी गरेका हुन् ।
नेपालको संविधानको धारा ११४ को उपधारा (१) बमोजिम मन्त्रिपरिषद्को सिफारिसमा अध्यादेश जारी गरेको राष्ट्रपति कार्यालयले जारी गरेको विज्ञप्तिमा उल्लेख छ।
यस्तै बैशाख २० गते राष्ट्रपतिले केही नेपाल ऐनलाई संशोधन गर्ने अध्यादेश जारी गरेका थिए । बैशाख १९ गते स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश, सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश र विश्वविद्यालय सम्बन्धी केही नेपाल ऐनलाई संशोधन गर्ने अध्यादेश राष्ट्रपतिले जारी गरेका थिए ।
यससँगै बैशाख १८ गते राष्ट्रपतिले सम्पत्ति शुद्धीकरण (मनी लाउण्डिरिङ) निवारण (तेस्रो संशोधन अध्यादेश तथा वैशाख १७ गते सार्वजनिक खरिद (दोस्रो संशोधन) अध्यादेश जारी गरेका थिए ।
त्यस्तै वैशाख १७ गते नै राष्ट्रपतिले सहकारी (पहिलो संशोधन) अध्यादेश पनि जारी गरेका थिए । मन्त्रिपरिषद्को १४ गते बसेको बैठकले अध्यादेशहरू सिफारिस गरेको थियो ।
