असोज २, काठमाडौँ

दक्षिण एसियाली फुटबल संघ (SAFF) U-17 च्याम्पियनशिप अन्तर्गत नेपाल र बंगलादेशबीच आज साँझ रोमाञ्चक खेल हुँदैछ। श्रीलङ्काको राजधानी कोलम्बोस्थित मैदानमा हुने यो खेल नेपाली समय अनुसार साँझ ७:३० बजे सुरु हुनेछ।

नेपालले आफ्नो पहिलो खेलमा श्रीलङ्कालाई २–० ले पराजित गर्दै विजयी सुरुवात गरिसकेको छ। पहिलो खेलमा उत्कृष्ट प्रदर्शन देखाएको नेपाल आजको भिडन्तमा पनि जित निकाल्दै समूहको शीर्ष स्थानमा पुग्ने लक्ष्यमा छ।

त्यस्तै, बंगलादेशका प्रशिक्षक र कप्तान दुवैले नेपाल बलियो प्रतिद्वन्द्वी भएको भन्दै खेल कठिन हुने आँकलन गरेका छन्। उनीहरूले टोली पूर्ण तयारीसहित मैदानमा उत्रने बताएका छन्।

यस पटकको च्याम्पियनशिपमा भारत, पाकिस्तान, भुटान, माल्दिभ्स, श्रीलङ्का, नेपाल र बंगलादेश गरी सात टोली सहभागी छन्। समूह चरणको खेलपछि शीर्ष दुई टोलीले सेमिफाइनलमा स्थान बनाउनेछन्। फाइनल खेल आगामी सेप्टेम्बर २७ मा आयोजना हुने तय गरिएको छ।

फुटबलप्रेमीहरूको ध्यान तान्न सफल भएको यस प्रतियोगितामा आज हुने नेपाल–बंगलादेशको भिडन्तलाई निकै महत्वपूर्ण मानिएको छ।