म्याग्दी ।।
म्याग्दीका विकास आयोजनालाई प्राथमिकता दिन नेपाली कांग्रेसका सभापति तथा पूर्वप्रधानमन्त्री शेरबहादुर देउवाले प्रतिबद्धता व्यक्त गरेका छन् ।
नेपाली कांग्रेस म्याग्दीले अाइतबार बेनीमा आयोजना गरेको कार्यकर्ता भेटभाटका क्रममा देउवाले साे कुरा बताएका हुन् ।
उनले म्याग्दी जिल्लाको सडक, नदी नियन्त्रण, स्वास्थ्य पूर्वाधार, धार्मिक पर्यटकीय स्थलको विकासमा अाफ्नाे पार्टीको साथ रहेको समेत बताएका छन् ।
सभापति देउवाले यसका लागि प्रधानमन्त्री केपी शर्मा ओलीसँग समन्वय गर्ने प्रतिबद्धता पनि जनाएका छन् ।
म्याग्दीका सभापति तथा प्रतिनिधिसभा सदस्य खमबहादुर गर्बुजाले सभापति देउवा समक्ष जिल्लाका प्राथमिकता प्राप्त आयोजनाका लागि बजेट व्यवस्थापन गरिदिने सम्बन्धमा मागपत्र बुझाएका थिए ।
उक्त माग पत्र बुझ्दै सभापति देउवाले प्रधानमन्त्री र मन्त्रीहरूसँग छलफल गरी योजना कार्यान्वयनका लागि पहल गर्ने प्रतिबद्धता जनाएका हुन् ।
मागपत्रमा बेनी–दरवाङ–मुना–ढोरपाटन सडकलाई मध्यपहाडी लोकमार्गको बागलुङ खण्डको विकल्प बनाउन स्तरोन्नति गर्नुपर्ने, बेनी–दरवाङ सडकको फापरखेतको पहिरोको विकल्पमा बेलिब्रिज जडान गर्नुपर्ने, बेनी बजारमा कटान नियन्त्रण आयोजना, बेनी–पाखापानी–मल्कवाङ चक्रीय सडक, पोखरेबगर–घोडेपानी–कास्कीलाई सडकले जोड्न, बृहत् चिमखोला पिप्ले भगवती खानेपानी आयोजना र अन्नपूर्ण आधार शिविर जोड्ने पदमार्गमा पूर्वाधार निर्माणको विषय समावेश गरिएको थियो ।
साेही कार्यक्रममा म्याग्दी रघुगङ्गा गाउँपालिकाका अध्यक्ष भव बहादुर भण्डारीले सभापति देउवालाई गुठी जग्गा सम्बन्धी समस्या समाधानका लागि ध्यानाकर्षण गराएका छन् ।
त्यस्तै साेही कार्यक्रमका अवसरमा देउवाले बेनी अस्पतालको निर्माणाधीन ५० शय्या क्षमताको भवनको पनि निरीक्षण गरेका छन् ।
विसं २०७४ मा सुरु भएको भवन निर्माणले पूर्णता नपाउँदा बेनी अस्पतालको सेवा प्रभावकारी हुन सकेको छैन ।
सहरी विकास मन्त्रालयमार्फत सञ्चालित अस्पतालको भवन निर्माणलाई तीव्रता दिनका लागि दबाब दिन उच्च तहका राजनीतिक नेतृत्वको अनुगमन गराइएको नेपाली कांग्रेस म्याग्दीका सचिव भरत रकालले बताए ।
