पोखरा/ नेपालमा पहिलो पटक बालबालिकाका लागि तयार पारिएको कमेडी रियालिटी शो ‘कमेडी किड्स’ को डिजिटल अडिसन सुरु भएको छ। महाशिवरात्रिको दिनबाट अडिसन खुला गरिएको आयोजक रघुजी फिल्म्स ले जनाएको छ।
बालप्रतिभाहरूका लागि सुनौलो अवसर!
चारदेखि १४ वर्षसम्मका बालबालिकाहरूले यस रियालिटी शोमा भाग लिन सक्नेछन्। इच्छुक प्रतियोगीहरूले बढीमा २ मिनेट लामो भिडिओ खिचेर पठाउनुपर्नेछ। भिडिओ मोबाइलबाट खिचेर एकल वा समूहमा पठाउन सकिन्छ।
कसरी भाग लिन सकिन्छ?
डिजिटल अडिसनमा सहभागी हुन इच्छुकले आफ्नो नाम, ठेगाना र सम्पर्क नम्बर सहित भिडिओ निम्न ठेगानामा पठाउन सक्नेछन्:
- इमेल: [email protected]
- ह्वाट्सएप / भाइबर: 9702091421
डिजिटल अडिसनबाट छानिएका प्रतिभाहरूलाई फिजिकल अडिसनमा बोलाइनेछ, जसबाट उत्कृष्ट प्रतियोगीहरू छानिनेछन्। कार्यक्रमको फर्म्याट अनुसार उत्कृष्ट प्रतिभाहरूलाई मुख्य प्रतिस्पर्धामा सहभागी गराइने निर्देशक सन्तोष खनाल ले बताएका छन्।
शोको तयारी पूरा, जुरी टिम छिट्टै सार्वजनिक
शोका लागि आवश्यक तयारीहरू लगभग पूरा भइसकेका छन्। निर्देशक सन्तोष खनाल को निर्देशनमा बन्न लागेको यो रियालिटी शोको जुरी टिम र अन्य सदस्यहरू फाइनल भइसकेको छ, जसलाई छिट्टै सार्वजनिक गरिने आयोजकले जानकारी दिएको छ।
नेपालका प्रतिभाशाली बालबालिकाहरूलाई अवसर प्रदान गर्ने ‘कमेडी किड्स’ ले हास्य कलाका नयाँ नक्षत्रहरू जन्माउने आशा गरिएको छ।
