कार्तिक १५, काठमाडौं ।।
नेपाल आयल निगमले डिजेल र मट्टीतेलको मूल्यमा प्रतिलिटर एक रूपैयाँले घटाएको छ।
निगमले गएरातिदेखि लागू हुने गरी डिजेल र मट्टीतेलको खुद्रा बिक्री मूल्य घटाएको हो । तर पेट्रोल र खाना पकाउने ग्यासको मूल्य भने यथावत छ ।
नयाँ मूल्य अनुसार चारआली, विराटनगर, वीरगञ्ज, जनकपुर, अमलेखगन्ज, भलवारी, नेपालगन्ज र धनगढीमा डिजेल र मट्टीतेलको खुद्रा मूल्य प्रतिलिटर रु.१४१.५० पुगेको छ।
त्यस्तै सुर्खेत र दाङमा प्रतिलिटर रु. १४३ कायम गरेको छ भने काठमाडौं, पोखरा र दिपायलमा प्रतिलिटर रु. १४४ तोकेको छ।
यस्तै हवाई इन्धन (आन्तरिक) मा पनि प्रतिलिटर रु. १२८ निर्धारण गरिएको छ भने अन्तर्राष्ट्रिय हवाई इन्धनको मूल्य प्रतिकिलोलिटर ७ अमेरिकी डलरले बढेको छ।
नेपाल आयल निगमले हालको मूल्य समायोजनलाई अन्तर्राष्ट्रिय बजारमा इन्धन मूल्यमा आएको उतार–चढावसँग सम्बन्धित बताएको छ।
