श्रावण १८, सोमबार
पोखरा ।।
गण्डकी प्रदेश सभाबाट पारित भई प्रमाणीकरणको प्रक्रियामा रहेका दुई महत्वपूर्ण विधेयकहरूलाई प्रदेश प्रमुखको कार्यालयले प्रमाणीकरण गरेको छ।
प्रमाणीकरण भएका ती दुई विधेयकहरूमा मगर र गुरुङ भाषालाई सरकारी कामकाजको भाषाको रुपमा प्रयोग गर्ने सम्बन्धमा व्यवस्था गर्न बनेको विधेयक र गण्डकी प्रदेश औद्योगिक व्यवसाय ऐन, २०७५ लाई संशोधन गर्न बनेको विधेयक प्रमाणित भएको हो ।
नेपालको संविधानको धारा २०१ को उपधारा (२) बमोजिम गण्डकी प्रदेश प्रमुख डिल्लीराज भट्टले सोमबार(आज) विधेयक प्रमाणीकरण गरेका हुन् ।
यी विधेयकहरूको प्रमाणीकरणसँगै अब मगर तथा गुरुङ भाषालाई सरकारी कामकाजमा प्रयोग गर्न र औद्योगिक व्यवसाय सम्बन्धी व्यवस्था थप परिमार्जन गर्न बाटो खुलेको छ।
यस कदमले स्थानीय भाषाहरूको संरक्षण तथा प्रवर्द्धन र प्रदेशको औद्योगिक क्षेत्रको कानुनी संरचना अझ स्पष्ट र प्रभावकारी बनाउन यो विधेयक महत्वपूर्ण हुने विश्वास गरिएको छ।
यस्तै प्रदेश प्रमुखको कार्यालयका सहायक प्रवक्ता सीता सापकोटा सुवेदीले उक्त विदाएकहरुको प्रमाणीकरणको जानकारी सार्वजनिक गर्दै सम्बन्धित सबै पक्षहरूलाई सूचित गरेकी छन्।
