भाद्र १२ गते, बिहिबार
काठमाण्डाैं ।। पोखरामा दिगो शहरी यातायात व्यवस्थापनलाई प्रभावकारी बनाउन “इ–मोबिलिटी परियोजना” सञ्चालनका लागि आवश्यक नीतिगत व्यवस्थाबारे कार्यशाला सम्पन्न भएको छ।
गण्डकी प्रदेश सरकार, नीति तथा योजना आयोग, विकास साझेदार, यातायात व्यवसायी, विज्ञ तथा सरोकारवाला निकायहरूको सहभागितामा बसेकाे उक्त कार्यशालामा पोखराको सार्वजनिक यातायात सुधारसँगै दीर्घकालीन व्यवस्थापनका उपायहरूबारे व्यापक छलफल भएको हो।
पोखरा नेपालको पर्यटन राजधानी घोषणा भएसँगै विकास साझेदार एसियाली विकास बैंकले प्राथमिकताका साथ यस क्षेत्रको यातायात व्यवस्थापनका लागि इमोविलिटी परियोजना सञ्चालनमा चासो दिएको हो ।
यसअघि नगर प्रमुख आचार्यले पनि आफ्नो मनिला भ्रमणका क्रममा एविडीको मुख्यालय पुगेर पोखरामा इमोविलिटी परियोजना सञ्चालनका विषयमा छलफल गर्रेका थिए ।
एसियाली विकास बैंक र ग्रिन क्लाइमेट फन्डको साझेदारीमा एक सय मिलियन अमेरिकी डलर बराबरको अनुदान तथा सहुलियत ऋण सहायतामा नेपालमा यो परियोजना सञ्चालन गर्न लागिएको हो । यस मध्ये पोखरामा ४० मिलियन अमेरिकी डलर बराबरको परियोजना सञ्चालन हुनेछ ।
परियोजना सञ्चालनका लागि आवश्यक समन्वय तथा स्थानीय व्यवस्थापनको कार्य पोखरा महानगरपालिकाले गर्ने नगर प्रमुख आचार्यले बताए ।
यस परियोजनाले पोखराको सार्वजनिक यातायातलाई थप व्यवस्थित बनाउनुका साथै वातावरण तथा पर्यावरणको संरक्षणमा समेत महत्त्वपूर्ण योगदान गर्ने उनले विश्वास व्यक्त गरे ।
नगर प्रमुख आचार्यले यातायात व्यवसायीहरूलाई सेवाको गुणस्तर सुधार गर्न र जनस्वास्थ्य तथा पर्यावरण प्रति सचेत बन्न आग्रह गरे ।
पोखरा लगायत समग्र गण्डकी प्रदेशको सार्वजनिक यातायात व्यवस्थापन गर्ने गरी प्राधिकरण गठनका लागि कानुनी संरचना निर्माण गर्न लागिएको प्रदेश सरकारले जनाएको छ ।
एसियाली विकास बैंकका वरिष्ठ सार्वजनिक व्यवस्थापन विशेषज्ञ अरुण रामामुर्ति नेतृत्वको प्रतिनिधि मण्डल परियोजनाका विषयमा भइरहेको छलफलमा सहभागी भएको छ ।
