अषाढ २९, काठमाडौं ।।
आज २१३औँ भानुभक्त जन्मजयन्ती देश तथा विदेशमा विभिन्न कार्यक्रम गरी मनाइँदैछ। यस अवसरमा नेपाल प्रज्ञा प्रतिष्ठान परिसरमा रहेको आदिकवि भानुभक्तको प्रतिमामा माल्यार्पणसहित विशेष कार्यक्रमको आयोजना गरिएको छ ।
नेपाली भाषा र साहित्यका आदिकवि भानुभक्त आचार्यको जन्म वि.सं. १८७१ साल असार २९ गते तनहुँको चुँदीरम्घामा भएको थियो ।
उनले संस्कृत भाषामा रहेको ‘रामायण’लाई नेपाली भाषामा अनुवाद गरी नेपाली साहित्यमा अतुलनीय योगदान पुर्याएका थिए ।
उनको ‘वधुशिक्षा’ ‘प्रश्नोत्तर’, ‘भक्तमाला’, ‘रामगीता’, फुटकर रचनालगायतका कृतिले नेपाली साहित्यलाई समृद्ध बनाएको छ ।
विषेशगरी नेपाली जातीय एकता, राष्ट्रिय पहिचान र नेपाली सांस्कृतिक चेतना जगाउन र राष्ट्रिय संस्कृतिलाई बलियो बनाउनमा भानुभक्तको ऐतिहासिक योगदान छ ।
उनको जन्मजयन्ती नेपालमा मात्र नभएर भारतको दार्जिलिङ, सिक्किम, भुटान, बर्मालगायत नेपाली भाषाभाषी धेरै रहेका ठाउँमा पनि मनाउने गरिन्छ ।
